*******************
حسين ديني ودنيتي يا كربله
مني الروح        لجله اتروح
*******************

لعيون تتجرح الم من فـــــرط لمصاب     والليل ما يخفي الجرح لو بدره ينصاب
وجني على طف كربله تــــتفتح اجفون     جفن المآسي لحالتي جفن اعلى لحبـاب
انظر لبو فاضل يويلي عــــايف الروح     مقطوعه جفينه وسهم بالعين ما خـــاب
وانته يعقلي اعلى الثرى تتقطع اوصال     مقدر اشيلك يالولد واوصل للطنـــــاب

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين

ياوالدي شوك الضـــــمى نسانا محياك     وشلون يرتد لي طــــــــرف بالعين وانساك
روحي على كفي تضل وتناظر الموت     تفداك روحي وما حــــــــوت للموت تفداك
ما انحني وديني طــــلب دمي ونجواي     اسعى ابمسارك والدي ومشي على ممشاك
موتي ولا عار الدهــــر يتلامس الجور     واسمك على صدري انحفر يحسين يهواك


ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين


فازت عـــــبيد ابها الفخر     لمــــا تخلت احرار
جون اللي ضحى ابمهجته     ويا حبيب ولنصار

بوفاضل الايدين          اهداها ويا العين

شقيت لحـــظات القدر     واتعــنى دونك والدي
انظر لجدي المصطفى     والزهره وياه او علي

شدوا على روحي          ما بانت اجروحي

ريدنـــــي وياه     وحشــــاي تفداه     جدي وحبيبي
عطشان للموت     ماضنتي يفوت     هذا نــــصيبي

يبني زرعتك بالعمر     وجنت انطر اثمار الربه
قلبك يناشد بالعطش     والمــــــوت قلبك يشربه

عاشر مع خسوفه          بمهنده اتشوفه

هذي الحيـــــــاة الفانيه     ماظن تريدك ياعلي
نور وقمر في مطلعك     والقـمر طبعه معتلي

مكتوب بجفوفك          والله ما عوفك

يمفـــارق النوح     لكبر يــــمجروح     ماضنتي تطيب
رايح ولا تهاب     من سيف لخظاب     يامـنبت الطيب


*******************
حسين ديني ودنيتي يا كربله
مني الروح        لجله اتروح
*******************


يحسين كلنا نعــــــــتلي لك كربله نزور     بس ما نوصــــــلكم وننظر ذيج لقبور
ندخل الحاير بالبــــواجي ولطم لصدور     ونحوم مثـــــــــل الجلد لو فارق حميه
ونشوف عد رجلك علي يحسين مدفون     وتهيج زفرتنـــــــه ويقرح ماي لعيون
نتذكر اوقوفـــــــك عليه ابقلب محزون     محني الظهر وتصيح يبني اقطعت بيه

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين

وبكل فريضــــه اتروح للحاير الشيعه     ومن مشهدك تطلع وتقصد للشريعه
تزور القمر لزهر ابو اجفوف القطيعه     شيال رايتـــــــــــكم وسور الهاشميه
وبعد الزيـــــــاره للمخيم بالبكاء انعود     بس ما نـــطبها تسيل دمعتنه بلخدود
نذكر منــــــــادي بن سعد ياقوم فرهود     حرقوا الـخيم سلبوا الحريم الهاشميه

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين


نسأل من الله تنحفظ     ارض العراق من الحرب
فيها النجابه والطهر     فيها النــــشامه والصحب

فيها شعب مسلم          اعليه زمن مظلم

اتجمعت كـــل القوى     امن الشرق ومن الغرب
نيتها تضرب الشعب     كرسي الحـكم ماينظرب

ماجت الى صدام          لكن الى الاسلام

تشهد فلسطين     علــى المظلين     ابهاي القضيه
تصرخ يحكام     ماعدكم اسلام     وغيره وحميه

ذاك الاب هـــذا الابــــــــن     كلها سـياسه واحده
شرب الدما ونهب الارض     وكل المذابح شاهده

حرب الطمع والجور          حاصر شعب مقهور

وانظر لحكام العرب     مثل النــــعوش امشيعه
كل حاكم ظله يخوفه     لو لحظه يمشي ويتبعه

تشوف الشعب ينداس     وتغض نظر واحساس


*******************
حسين ديني ودنيتي يا كربله
مني الروح        لجله اتروح
*******************


اسهام تحسب بالنــــبظ في قلبي يحسين     وسيوف ترصد النفس بنهاري والليل
لوطاح نجمي بالترب تحضني بالروح     لكن لو نجــــمك وقع منهو الذي يشيل
لوجت زينب مصــرعك ويا النساوين     ابياحال اتلم الجــسد واضلاعك اتشيل
تحتار تـــــــــــــــنزع القلب من لمثلث     يحسين لو تنزع ضلع من حافر الخيل

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين

للموت ماشــــي والزهر عمرك يصنديد     بالسيف وبخيل الشمر يوليدي ينداس
اتروح يالمـــــــــاخذ قلب امك للحتوف     والقوم تطعن بالرمح ماعدهم احساس
وتشوف ظـــــــالم يطعنك ويفرح القوم     وآشـــــوف دم ابرقبتك سايل ينوماس
ومن شاف غرة النبي بوجهك يمحبوب     جالك هالعبد وضرب يوليدي بالراس

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين

دمك على عين المهر     سال وحجب عنه النظر
يريد يوديك الخــــــيم      لكن اجابــــــــك للخطر

دمك على اعيونه          والقوم يطعنونه

قلبي رسم فوق الدمع     لون الجـــمر والعاطفه
حامي الخيم لو يندبك     بعدك على الدنيا العفى

يالقطعوا اوصاله     ودمومه سياله

يمـــــــــقطعينه    يمــــــوزعينه     اقبال النســــاوين
حاجيها واجان     مهجتك نيران     خذ مهجة احسين

رايــــــد اودع النسا     واتزود اوداع ونـــظر
لكن يبو اليمه عسى     هالطاغي ميحز النحر

راسك على الشريان          ذابحني بالتربان

فوق الضلع تسمع كسر     وشـيحتمل هذا الصدر
الله يــــــــــصبر الخدر     من تهجم خيول الشمر

تفزع الرضعان     ماترحم النسوان

وتخلي لجـــسام     في عـين ليتام     منحورة الراس
لكبر الضرغام     والبطل جسام     والحامي عباس


*******************
حسين ديني ودنيتي يا كربله
مني الروح        لجله اتروح
*******************


يحـــــسين في عين الخيم نصبة المها     ورضعان تتوجر عطش شكواها في العين
واطراف تتراعش يبويه شفتها هاليوم     ورموش كتبت في الوجه عطشانه يحسين
ومــــــــحتار مابين المنايا وبين لخيام     وياليت قلبي ينقـــــــــــــــسم يابويه نصين
امســــح روعات الطفل وهدي لوجاع     يسبح نحرك بالفــــــــــــــلا ودمه صوبين

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين

ممشاك يالاكبر سهم يطعني ممشاك     واجتن ناوي اعلى الحرب خذ روحي وياك
ايهون لـــــــــــمثلث اذا قطع لي لفاد     ولاشوف نـــــحرك منخظب يوليدي بدماك
لوعاد مهرك للــخيم صهيله شيقول     الماي لو ســــــــــيف الاعادي روو اضماك
اتروح يالعــــذب الذي يعذب الروح     والقــــــــــــــــاك ياوجه القمر بالغبره القاك

ياكربله المصارع          ماتنـــــــــــشف المدامع
تتواصــل الفجايع          وآخرها مصرع حسين

سكنه الحزينه امن الخدر     تطــلع تشمك ياعلي
بعد المعزه وشكــــــــــثر     حلو العمر الك والي

وياخويه هالساعه          اترقب اوداعه

زينب اجتك مــــعوله     حاطت عليك العايله
حسره الشمايل يالولد     غيـــبها وادي كربله

ونشوفك امطبر          والدم على المنحر

رايح الى الماي     وترجع يحـــماي     للــخيمه بالدم
الى الصــياوين     لو جابك احسين     شحال المخيم


*******************
حسين ديني ودنيتي يا كربله
مني الروح        لجله اتروح
*******************