إننا للموت عشاق الحسين

ثالث محرم 1430

مأتم راس رمان

للشاعر المرحوم:ملا عطية الجمري

وللرادود الحسيني:سيد حسين الوداعي

مساهمة من : الحلم المستحيل

واحسيناً .. واحسيناً .. واحسين

إننا للموت عشاق الحسين

شيعتي نصبوا المآتم و العزاء لمــــــــصيبتي

و اذكروا تعفير خدي بالتراب و ذبـــــــــحتي

لو شربتوا الماي ذكروني العطش فت مهجتي

و اقصدوني بكربلا و الكل يـــــــسچب عبرته

واحسيناً .. واحسيناً .. واحسين

إننا للموت عشاق الحسين

لو تشوفوني يشيعة عالثرى مرمـي طريح

خدي متوسد ترايب و الدما مني تـــــــسيح

چم عضيد و چم ولد ليه قضى يمي ذبــــيح

واحد يظل في الشريعة و واحد ارفع جثته

واحسيناً .. واحسيناً .. واحسين

إننا للموت عشاق الحسين

شيعتي و اللي كسر ظهري و نحل مني القوى

وحدتي من وگع يم النهر شيال الـــــــــــــلواء

وصلت يمه و لقيت ادمومه و مخه ســــــــوى

و الچفوف مقطعة يذوب الگلب من شــــــــوفته

واحسيناً .. واحسيناً .. واحسين

إننا للموت عشاق الحسين

شيعتي و ابن الحسن جسام عريــــس و شباب

صارت العركة عروسه و الدما السافح خضاب

الدثار النبل و فراش الولد حر الــــــــــــــتراب

و بين كوفي و بين خطي و بين هندي زفــــــته

واحسيناً .. واحسيناً .. واحسين

إننا للموت عشاق الحسين

شيعتي و ابني علي لكبر نحل مني الــــــــجسد

بس شبح بالعين ليه عالثرى راح الـــــــــــجلد

بدر كامل ما جرى عند الخلق مــــــــــــثله ولد

يجذب الونه و يعاين نور عيني ارويـــــــــحته

واحسيناً .. واحسيناً .. واحسين

إننا للموت عشاق الحسين

شيعتي و لازم يوصلكم خبر عـــــــني و علم

طفلي عبدالله على صدري انفرى نحره بسهم

شفته  وگلبي تطفر و استهل دمي بـــــــــــــدم

شبح لي بعينه و جذب ونه و مالت رقـــــــبته

واحسيناً .. واحسيناً .. واحسين

إننا للموت عشاق الحسين

شيعتي كثر البچى حقي علــــــــيكم و النحيب

شفتوا مثلي بالخلق مذبوح عطشان و غريب

و الچفن سافي يشيعة و بالدما شـيبي خضيب

و الحراير نصب عيني من خدرهــــا مشتته

واحسيناً .. واحسيناً .. واحسين

إننا للموت عشاق الحسين